一支公今日同大家嚟到九龍灣食Burger。
Burger一直係唔少人一個人開餐嘅選擇，只要去老麥行返個轉，分分鐘隔離左右全部都係一個人開緊餐。
最近一支公屎忽痕周圍籐，咁啱發現間比多十零廿蚊可以食個大件夾抵食嘅Burge舖頭仔，緊喺要同大家分享吓。
 |
| Food Count入面其中一間舖頭仔 |
一支公今次叫咗個牛肉芝蛋堡，承惠＄42，就算係自認大口嘅一支公都一啖咬唔晒個Burger，至於塊牛肉目測應該有一個棟起嘅5蚊銀咁高。
牛肉咬落去係會咇汁，隻蛋煎到半熟仲有少少蛋汁，加埋沙律菜個汁甜甜地，咬落去口感豐富得嚟仲好Juicy，雖然芝士同牛肉味唔係話好濃，不過以喱個價位嚟講算唔錯。
唯一可以挑剔吓嘅地方係因為個包大大個，就算舖頭本身有用張紙包住，咬落去都係好容易搞到成手都係汁，最好問定舖頭拎多幾張紙巾。
其實一支公除左個包之外仲叫加咗＄15要薯角同罐可樂，成個set加埋承惠＄57。
薯角分量算多，不過質素就普普通通，一支公都係拎嚟填吓肚，最尾都無食晒，細食嘅話齋食Burger都夠飽。
其實一支公最鍾意都係Burger配返薯條，夠晒Classic，不過加＄15要set嘅話剩係得薯角，洋蔥圈同埋手指魚柳三樣野揀，要薯條就要另外再加錢，感覺上無咁抵食。
至抵嘅食法嚟講一支公都係推介齋叫Burger加野飲，因為Burger夠晒大嘅關係其實都夠飽。
一支公舒適度：3.5/5
一支公抵食度：4/5
一支公好味道：4/5
一支公抵食度：4/5
一支公好味道：4/5
沒有留言:
張貼留言